Øll kunnu læra støddfrøði

Teir hava sett sær fyri at framleiða dygdartilfar á føroyskum, ið tryggjar møguleikarnar hjá øllum at læra støddfrøði á miðnámi – púra ókeypis. Umvegis youtubefilmar hava teir arbeitt miðvíst við málsetninginum, og í skrivandi stund eru teir komnir hálvvegis við verkætlanini.

Høvuðsorsøkin til at teir báðir fóru undir verkætlanina var, at teir sóu eina keðiliga gongd í støddfrøðiførleikunum hjá føroyskum miðnámsnæmingum.

Janus og Magnus, sum báðir búgva í Danmark, høvdu javnan tosað saman um, at man manglaði føroyskt undirvísingartilfar í støddfrøði. Báðir høvdu teir havt sínar hugsanir um undirvísingartilfarið í støddfrøði, tá teir sjálvir gingu í skúla í Føroyum.

– Tá eg gekk á miðnámi, dámdi mær betur at læra umvegis heimasíður, ið brúktu videobrot. Eftir miðnám havi eg javnan hjálpt vinum við støddfrøði, men tá hevur tað sum oftast verið á donskum. Hetta ynskti eg at gera nakað við, sigur Janus, sum í løtuni lesur kandidat í støddfrøði og serliga hevur lagt seg eftir fakum, sum hava samband við miðnámslærarayrkið.

– Eg luttók á ungdómstinginum í 2014 vegna 9. flokk í Venjingarskúlanum. Vit løgdu tá fram eitt uppskot til broyting í fólkaskúlalógini, sum ásetti, at alt undirvísingartilfar skuldi vera á føroyskum, sigur Magnus, sum lesur støddfrøði-búskap á Keypmannahavnar universiteti.

Vit mettu, at tríggjar høvuðsorsøkir eru til, at støddfrøðin hevur tað trupult í føroyska skúlanum. Fyri tað fyrsta er støddfrøðin komin í ringt orð og fleiri óttast støddfrøðina, og tað skapar lærublokeringar. Fyri tað annað er nógv av tilfarinum, sum verður nýtt, á donskum, hóast næmingar ynskja føroyskt tilfar. Harafturat er lítið og einki talgilt undirvísingartilfar á føroyskum.

– Vit miða eftir at gera tíðarhóskandi, livandi og talgilt tilfar á føroyskum, sum vónandi kann  minka um óttan og veksa um lærihugin og úrtøkuna.

Fyri Magnus og Janus er sera umráðandi, at góðskan er í lagi, og at lærarar trygt kunnu líta á tilfarið. Tí er avtala gjørd við Nám, ið tryggjar, at tilfarið námsfrøðiliga, fakliga og málsliga er í samsvari við almennu námsætlanirnar.

– Nám fær handritini og ritstjórnar og viðger tey, áðrenn nøkur filmsframleiðsla fer í gongd. Á tann hátt tryggja vit, at filmarnir eru í tráð við ymisku tættirnir, ið eru umráðandi at hava í huga í undirvísingini í støddfrøði á miðnámi, siga teir báðir at enda.